要聞港聞

假難民為禍香江 治標靠善用方艙

俗語有云︰「一粒老鼠屎,壞了一鍋粥!」假如本港足足有萬幾兩萬粒「老鼠屎」,就算幾繁榮昌盛,港人遲早都一鑊熟!唔想咁樣,港府喺推動經濟復甦嘅同時,就要揪出呢啲「老鼠屎」,清理禍患,香港先有望長治久安!
講到禍患,相信大家首先會諗起嘅,肯定係假難民同埋南亞幫啦!原因無他嘅,出街行吓隨隨便便總見到一兩個南亞人,每次見親都膽戰心驚,直頭街頭見到街尾就兜路走,又點會唔係第一時間諗起呢?唔係想一竹竿打沉一船人,查實香港都有好多奉公守法嘅少數族裔,可惜假難民實在太多,又經常為非作歹,上至謀殺強姦,下至偷盜搶劫,十單有八單都關假難民嘅事,好難唔令港人留下刻板印象,隨時少數族裔見到假難民嗰陣,自己都驚埋一份!
呢啲假難民對香港毫無貢獻,偏偏喺過去10年,港府足足花咗85億元喺佢哋身上;假如拎呢筆公帑當消費券派畀全港市民,每人足足分到1,300蚊,相當於好多人半個月甚至一個月嘅飯錢!香港現時有好多人開飯都成問題,港府繼續慷納稅人之慨,尤其家吓財赤咁誇張,自然惹來民怨啦!如果冇假難民,點止庫房慳番好多,甚至連執法部門,都可以投放更多資源喺打擊毒品、黑幫等嚴重罪案之上;況且,冇晒假難民,亦即係黑幫都冇埋「南亞兵團」,意味着黑幫實力將受到重創!
所以話,假如冇晒假難民,本港現時面對嘅種種難題,都會得到解決或紓緩!咁點先可以冇晒假難民呢?「治本」嘅方法就梗係退出《禁止酷刑公約》啦!呢條公約係由港英政府簽下嘅,香港都回歸祖國懷抱25年啦,仲唔退出等咩?更何況,大家睇吓英國佬,依家咪又係將啲非法入境嘅難民送去非洲盧旺達,係得港府先咁笨,繼續接收!孟子有云「親親而仁民」,愛都有層次,港府係咪應該先關愛香港市民,之後先考慮幫助其他人呢?
好可惜,呢個「治本」方法,本報同各界倡議咗咁多年,港府始終一啲回應都冇,簡直令人痛心疾首!有見及此,有議員同學者提出折衷嘅「治標」方式,就係等疫情結束之後,可以善用偏遠嘅方艙醫院作為難民營啦!雖則話現時有聲音,認為方艙醫院可以轉型為過渡性房屋,但其實兩者冇衝突;如果間方艙係近市區嘅,自然可以用作過渡性房屋,但如果係母雷公咁遠,邊有市民肯住,咪可以拎嚟做難民營囉!
聽到「難民營」3個字,大家可能覺得有疑慮,擔心有人道問題;但講真,對於真係逃避戰火、饑荒或者酷刑嘅難民嚟講,有得食有得住,方艙環境又唔差,真難民係嚟避難,又唔係嚟度假,點會咁多奢求啊!至於嗰啲根本唔係避難嘅假難民喎,見到要入難民營,自然打退堂鼓,屆時分分鐘連審核申請嘅程序都慳埋!
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500