政情：渡海泳 容海恩衰游得慢 靠老公教路過關

據了解，玩開三項鐵人賽嘅議員鄭泳舜（Vincent）早前喺議員群組度放咗渡海泳嘅資料出嚟，睇吓其他同事有無興趣，結果就只有佢、Eunice同旅遊界議員姚柏良（Perry）報名參加優悠組嘅賽事，尋日就去咗參加水試，要喺45分鐘內完成1,500米。

咪以為Eunice只係鍾意打機，原來佢都好鍾意水上活動，唔講唔知，仲有泳池救生章㗎，但原來係20年前考嘅，唔知依家仲掂唔掂呢？Eunice話今次係第一次參與水上比賽，由於好耐冇游都擔心會生疏，仲形容呢次係游「大膽水」咁話喎，所以佢為咗比賽亦有勤加練習，前排去旅行後一返嚟轉咗「藍碼」就即刻操水。

佢尋日喺社交平台貼文話為咗水試練咗3晚，但第一晚游咗500米已經抽筋，而第二晚成功游完1,500米，但就超時咗3分鐘。咁點算好？最後係老公袁彌昌出手，幫佢改善泳姿，返屋企再睇網上短片學習轉身。尋日終於喺戰戰兢兢嘅心情下，通過水試，佢仲話游到「手都軟埋」。雖然達標，但佢都唔敢放鬆喎，話喺23號前抽時間去沙灘，熟習吓環境咁話。

Perry都係首次參賽，話一直都有留意開渡海泳，亦一直都想試吓喺海中欣賞維港嘅景色，所以見Vincent擺咗啲資料出嚟就報名參加。佢話首次參賽好緊張，亦可能因為太緊張，水試時佢發力游，最後用咗36分鐘就游完1,500米。對於初哥嚟講，呢個時間算唔錯喇！咁Vincent又點呢？佢喺社交平台貼文話唔單止成功達標，仲比預期中快咗少少咁喎。講到嚟緊有冇話想游出咩時間，佢就話今次比賽都係志在參與，身體力行咁支持渡海泳呢項盛事，所以都冇追求咩時間咁。上年因為要準備選舉無時間參賽嘅佢，仲話對賽事好期待喎。