政情：青年市集開檔 議員帶菠蘿探訪

本身係工會成員嘅議員陸頌雄同鄧家彪（Bill）都有現身市集。對於手上嘅菠蘿，阿Bill話其實係有寓意，事關港人稱為「菠蘿」嘅生果，喺某啲地方係叫做「旺來」，所以大家拎住個菠蘿，送畀攤檔係祝福對方生意好，市道旺盛幸運來咁話。佢又指負責籌備今次市集嘅地區組織向來十分活躍，不時都會舉辦活動，而今次主題就以青年為主。

參觀市集過後，阿Bill有乜嘢體驗呢？佢話有後生仔研發，搵人夾時間打籃球嘅手機應用程式，隨時隨地都可以喺唔同區組隊，大讚年輕一輩諗頭多。另外，佢幫襯青年玄學家睇掌紋同面相，對方話見佢右手斷掌，處事會較為執着；雖則冇除口罩嘅情況下睇面相，但對方就指佢耳仔大得嚟有啲薄，擔心佢唔夠瞓、小心腎虧咁話喎！