昔日東方政情：建築量10倍算 3層村屋變30層屋邨
議員獻計增供應 放寬地積比有得諗
房屋供應嚴重短缺，輪候公屋時間超過6年，呢個深層次問題未解決，令民怨大爆發。身兼立法會議員同九龍城區議員嘅楊永杰直指「明日大嶼」同「北部都會區」遠水不能救近火，但就話政府都要撲火，唔通燒死自己先嚟後悔？佢建議政府放寬新界地積比，喺元朗同天水圍附近嘅3層村屋改為30層嘅屋邨，咁就可以加快提供單位嘞！政府有冇諗過呢？
今屆政府上任後，隨即成立包括「公營房屋項目行動工作組」同「土地房屋供應統籌組」等4個工作小組，以加快建屋同土地供應，前者要喺新政府上任100日內提交初步計劃；後者則要確保房屋供應提速、提效同提量。
提交報告嘅死線愈嚟愈近，政府亦將喺今個月發表新一份施政報告。時日無多，楊永杰日前接受網台節目訪問，聲言只要一個動作，就可以釋放大量土地。乜嘢動作？就係放寬新界嘅地積比限制。
佢話由現時嘅5倍放寬到6倍或以上就可以有效解決房屋問題，將新界嘅村屋改建成屋邨，由3層變成30層，咁先可以將建築量提高10倍，特別係元朗、天水圍等鐵路沿線、或者鄰近港鐵站嘅村屋都可以考慮。
雖然香港大部分土地都喺新界，但楊永杰指出地積比限制先係最大嘅問題。佢質疑目前5倍嘅地積比限制，點解唔放寬到6倍、7倍，事關市區都可以放寬到9倍喇！若果新界地積比增加，就即時可以增加建築量，但唔明白政府點解一直都唔推行呢項措施？定係政府怕放寬之後會打冧樓價，地產商唔鍾意？又或者政府先係地產霸權最大嘅維護者？
儲備不足 要令土地更有價值
政府早前指要縮短建築時間，又話要做到提早上公屋。楊永杰認為呢啲大家都同意，但佢質疑土地儲備不足，加快落成一批房屋後就無以為繼，所以關鍵係政府要令到土地更有價值，或者點樣去收回更多嘅土地，呢啲先係有效嘅方法。
佢認為政府唔突破政策框框，就唔會增加土地供應，而市民對政府係咪有信心，係睇政府提出嘅政策係咪有效，仲話唔好當市民係傻仔，因為政府提出嚟嘅政策，市民都會知道係咪有效。而「公營房屋項目行動工作組」亦就快要交功課，究竟交出嚟嘅係良策定係拖得就拖？好快就揭盅。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
