政情：傾職安健滿火藥味 議員拉隊離場

話說提交立法會審議嘅《2022年職業安全及職業健康法例（雜項修訂）條例草案》，將可公訴罪行嘅最高罰款升至1,000萬元及監禁兩年，商界都擔心中小企業會因此破產；而代表商界、或與商界關係密切嘅議員就喺會上盡量爭取發言。批發及零售界議員邵家輝，指審議法案「快可以，但唔好急」，儘管主席陸頌雄已講明每人限發言3分鐘，但邵堅持若不能暢所欲言就會提出修訂，結果邵第一輪發言，連問連答就用咗9分鐘。

然而陸嘅讓步，就招來黨友鄧家彪質疑「再拖，拖到幾時呀？」指有啲議員嘅發言其實同法案無關，要求主席陸頌雄嚴守發言時間。陸就話希望議員同事暢所欲言，故容許彈性，但發言都唔好拖得太長。然而會議上嘅火藥味並未因此而平息，議員陳紹雄質疑陸不召開公聽會；議員江玉歡斥政府未有充分回應。陸決定不設第二輪發言，直接進入逐條審議。當議員陳曼琪提出追問時，旋即被陸「閘停」。陳批評陸並無注意條文嘅嚴重性，又指陸「你根本就係要過！你根本就唔尊重我哋！我好唔滿意，我要離場！」及後多達8位議員步出會議室，包括陳曼琪、江玉歡、郭玲麗、龍漢標、邵家輝、李鎮強、陸瀚民及陳紹雄。陳曼琪指「愛國者治港唔係咁㗎嘛，都唔畀人問」，郭玲麗則指陸應要求官員作出回應，斥陸處理手法似為政府護航。