政情：陳亨利推介漁業時裝 唱好中港

Henry認為時裝係軟實力，指近年南韓東大門時裝周就令到國際注目，佢認為彼邦嘅做法值得參考。鑑於深水埗向來都係布匹、成衣同服裝配件嘅集散地，加上近年有好多文青店舖進駐，認為深水埗可作為本港設計師集中發展嘅據點。另一方面，佢建議喺前海設「時裝品牌區」，招攬世界各地嘅服飾品牌進駐，成立區域總部，打造集文化、服飾同品牌於一身嘅時尚主題區，吸引世界各地嘅人嚟購物、打卡，屆時中港知名時裝品牌、初創品牌、新進設計師，都可以藉呢個「跳板」，向全國、全世界嘅遊客銷售，讓佢哋感受到國家文化嘅軟實力。Henry又提到，唔少內地品牌都做得好好，港企與內企應併船出海走向國際，可以話係商機無限。

代表紡織業界嘅Henry，原來亦身兼香港遠洋漁業協會會長，旗下船隻有百多艘，主要喺太平洋捕撈吞拿魚。佢形容，遠洋漁業有如橋樑，連結島國民間外交，建議太平洋島國嘅年輕人到內地讀大學，同時鼓勵內地漁農業及航運業學生前往島國實習，培養人才同時，增加兩地交流，說好中國及香港故事。