政情：梁振英老婆 拖37萬工程費案 捲官非一身蟻

申索人係「意建築師有限公司」（I Architects Limited），被告人「齊惜福」（Food For Good Limited）。據申索人喺申索書上披露，被告人自2021年1月18日起，委託申索人於長沙灣麗閣邨麗薇樓一地舖進行電力、冷氣同裝修工程，3項工程合共收費728,130元。所有工程於同年8月26日完成，但被告人未有支付尾期款項合共372,560.5元。申索人於去年11月至今年2月期間，分3次入稟追討尾數，由於小額錢債審裁處每次只會處理不超過75,000元嘅金錢申索，故申索人現時合共只追討217,220元款項及相關訟費，當中嘅差額則放棄追討。

小額庭尋日就本案作案件管理，被告人早前喺文件冊已提出，認為本案牽涉「訴因分割」，尋日再補充指3宗入稟均與電力供應有關，而供電系統屬「後加項目」，已包含喺牽涉約200萬元金額嘅主合約之內，亦都係主合約列明嘅工作內容之一，而非獨立項目或獨立合約，因此3宗入稟應被視為同一項申索。申索方則指，3宗入稟牽涉3個不同事件、不同日期、不同工程，連工作嘅師傅都唔同，所以要分開計算，但申索方明言唔打算喺區域法院追討，希望留喺小額庭處理本案。裁判官將案押後12周，畀雙方準備書面陳詞同回應，下次提訊時再就該議題聽取口頭補充，法庭或會即日作出裁定。