政情：謝偉銓巡視街市 翻新唔可以遲

立法會食物安全及環境衞生事務委員會將於下周三前往香港仔街市考察，同行嘅仲有環境及生態局局長謝展寰、以及食物環境衞生署署長楊碧筠等人。謝偉銓作為考察團成員之一，指政府希望了解議員對街市嘅意見，繼而作出調整；而佢都想了解工程嘅進展，於是促成今次嘅考察。謝偉銓希望街市能改善通風系統，增加多啲綠色環保元素。但要街坊願意喺街巿佇足耐一啲，最緊要一改過去濕𣲷𣲷嘅形象，同埋唔好囤積貨物。

政府喺2018年宣布預留20億元推行為期10年嘅「街市現代化計劃」。而位於香港仔市政大廈旁，於1983年落成嘅香港仔街巿樓高3層，然而每層都無冷氣。有見該街巿已服務區內街坊近40年，現正進行全面翻新，而工程範圍就包括加裝空調系統、重整街市同熟食中心布局、擴大攤檔同通道、增加公共空間同座位、提升無障礙設施以及翻新街市主外牆等。