昔日東方政情：DQ風波 美學院話搞錯 林哲玄扯火
怒轟虛偽 企硬放棄院士稱謂
立法會醫療衞生界議員林哲玄，早前遭美國外科學院（American College of Surgeons）褫奪院士資格嘅事件有新發展。該學院上周向香港分院會員發出電郵，指學院不再向「中國公民」提供院士或會員資格，因此林哲玄嘅「國際院士」資格亦會被取消。事隔一周，學院突然改變態度，日前向相關人士發出跟進電郵，指先前嘅電郵係誤發，又澄清會員資格或身份並無改變，然而曾聲稱要同學院「劃清界線」嘅林哲玄則堅持立場，向學院表明放棄院士資格。
校方拒向中國公民發資格
上周四（22日）林哲玄於社交平台公開一封來自美國外科學院嘅電郵，指學院鑑於中國法律規管境內運作嘅外國機構，學院為免帶來問題決定不再向「中國公民」提供院士或會員資格。由於林哲玄係中國公民，其「國際院士」資格自然亦遭到波及。不過該電郵又強調，若果收信人國籍並非「中華人民共和國」，可聯絡學院恢復會籍，又指學院將尋求方法重新收取中國公民會員，並歡迎林哲玄以非會員醫生身份，繼續參與學院嘅醫學會議同教育課程。
被學院DQ嘅林哲玄大表不滿，指內地同香港近期並無就規管外國機構而修訂法例，唔知道電郵提及係邊一條法例。佢又指學會只係一個國際學術機構，不具發出執業資格嘅權力，所謂院士或會員資格「實質作用係零」，認為學院嘅決定可以令自己「慳番年費」，仲怒轟學會「大美國」、「虛偽至極」，係時候劃清界線咁話。
林哲玄向本報證實，前晚收到美國外科學院電郵解釋，指上次嘅電郵屬誤發（email was sent in error），因此佢嘅會員資格不受影響。之不過，林哲玄認為學院並無交代何以會誤發電郵，以及點解會出現唔再接受中國公民成為會員或院士嘅說法，佢又質疑學院方面，是否視香港為中華人民共和國不可分離的一部分。林哲玄又話，除非該學院撤回上一封電郵嘅表述，否則佢唔覺得自己繼續任該院院士係恰當，故此回覆電郵表明放棄院士資格。
港分院發文反對美校說法
美國外科學院中國香港分院亦於周二（27日）發新聞稿反對，指出學院嘅決定係針對會員居住地，有欠公平及有損專業，並且向學院作出嚴正跟進及反對。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
