政情：「衞生署」來電何栢良機警冇受騙

何栢良尋日喺社交平台貼文，話朝早收到嗰個電話，對方係講普通話嘅，於是佢就問對方識唔識講廣東話，對方好似聽唔明，但佢用本地語言，對方竟然聽得明喎。咁已經唔多對路喇！跟住對方仲對何栢良講話佢有一份醫療文件重要通知添！何栢良心諗唔通自己中咗？於是又同對方傾多兩句之後，對方就話要同佢核實資料。

私隱喎，當然格外小心，何栢良即刻問對方香港衞生署個領導人叫乜嘢名？對方窒咗，停咗5秒。好明顯對方係唔識答啦！唔識答仲惡過人，何栢良話對方跟住話「我嘥佢時間喎」，之後就收線嘞！何仲反問「乜咁快收線呀！我都未話畀佢聽今朝都仲係一線員工」，即係佢做咗快測冇染疫呀！擺明係騙案喇，何栢良仲話雙方嘅對話已經錄咗音，呼籲大家小心詐騙。