要聞港聞

地署只知貼通告 村霸睬你都有味

天道有則,人心莫測。各位,世事變亂,亂象之所以久久未能撇清或擺平,往往在於執法者嘅拖拉,甚至不作為!古人就話,大抵世之所以彌亂者,第一在黑白混淆,第二在君子愈讓,小人愈妄!西貢相思灣村土地亂象,不正是具有以上兩大徵兆嗎?
「村霸」黃子洋明目張膽霸完陸地霸落海,經本報圖文並茂踢爆其惡行;佢伐林建石屎路,鋪黃泥裝假狗,惟相關嘅修復工程卻由政府部門「執手尾」及公帑「埋單」,這不是黑白混淆嗎?功夫茶大早一再指出,若然違法者往往無乜後果,變相縱惡,惡人得不到應有嘅刑責,得戚之餘就愈妄!
呢嗱!秋風已起,西貢相思灣村土地亂象有啲新進展,係唔係有人靜靜雞,認低威吖?或者牙斬斬,死得慘吖?錯錯錯!原來秋風起,黃葉飛,唔係有惡人被「秋決」!小事一樁,村霸長期佔用官地擺放水上活動中心用品,又佔用祖堂地擺檔做生意,大剌剌嘅霸道行為惹村民生厭,經村民多番投訴後,地政總署終於唔可以再扮純情,聽唔明,喺尋日採取行動,於涉及被佔用嘅土地外圍及多處地點張貼告示,要求涉事人喺10月6日之前停止佔用有關土地,否則會採取執管行動喎!
阿哥!咁算係「先禮而後兵」?村霸非法經營呢個私家「水上樂園」有一段日子喇!依家地政總署又再發揮「禮貌之城」嘅精神,畀足成個多星期叫佢「停止佔用官地」,地政總署化身為「禮貌大使」,都幾好笑!各位,假設有賊人擅闖你間屋,你肯用10日時間禮貌周周招呼完佢,先叫佢「停止佔用客飯廳、睡房」嗎?再施施然等個賊佬屙完篤屎先沙喲娜拉喔?若然,你都算可以得道成仙成佛咯!
各位,早前因違反停業令而被罰款6,000個大洋嘅村霸,佢經營嘅水上活動店尋日仍有開業,不過就唔見有客人光顧;佢繼續將大量水上活動用品擺放於村內一處官地,即使早前被多番投訴亦一於少理。阿哈!擔大旗「打擊衞生黑點」嘅政務司副司長卓永興,上個月落區視察時,見荔枝角道一條後巷堆滿垃圾雜物,怒斥有人「太歲頭上動土」,必定追究!今村霸何嘗不是「太歲頭上動土」?
各位,亂丟垃圾都係靜靜雞,村霸卻明霸明侵,這豈非又喺老虎頭上釘蝨乸?早前有村民舉報,指黃子洋父子涉嫌喺居住祖屋前方祖堂地,違規僭建一間石屎屋作為獨立廚房及廁所,涉嫌用作招待租用獨木舟嘅客人,引起衞生環境問題,村民亦敢怒不敢言。本報記者到現場視察,發覺地政總署喺多處貼有告示,飭令佢要於10月6日之前停止。喂!啲通告唔通係驅鬼靈符?叫得「村霸」,一紙通告真係睬你都有味啦!
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500