政情：「0+3」與行家唱反調 張宇人鬧有人扮代表

Tommy尋日喺社交平台上載咗段短片，話對於政府放寬海外入境檢疫政策至「0+3」，表示絕對支持，亦都明白政府按部就班嘅工作。之不過，佢就批評有人扮業界代表，稱「0+3」係會影響飲食業界嘅生意。整段片無點名話邊個扮代表，但Tommy直斥嗰個人毫無科學根據，佢唔認同市民外遊後返嚟香港會冇錢食嘢，同埋整體經濟係會好咗，因為展覽會多咗，一定會滲落去唔同行業，最多都係無大增長，而唔會唔見咗生意。

之後問佢點解咁勞氣？佢話由「3+4」改做「0+3」已經行咗好大步，放寬檢疫政策肯定對飲食界有幫助，當然係要有內地旅客嚟先可以推動零售業，同進一步令飲食界受惠，佢話都好想快啲同內地通關，但唔係港府單方面可以決定，大家都明白難處喺邊，就更加唔好講啲唔負責任嘅說話喇！

佢喺短片中仲強調飲食業界嘅代表亦都係「只此一個」，就係佢本人喇！佢嚟緊都繼續致力爭取鬆綁社交距離措施，包括放寬每枱人數及宴會人數。翻查紀錄，Tommy自2000年立法會選舉後，一直冧莊飲食界議員至今，其中兩次係無競爭下自動當選。