政情：紅館意外部門拋波拒交代

特首辦耍官腔文體局匿一旁

職場卸膊好常見，但如果連政府都係咁，市民就真係有冤無路訴。講緊嘅就係社福界議員狄志遠早前去信特首辦，要求跟進及交代MIRROR演唱會紅館意外事件，但有關信件最終竟然係由1823代收，好似玩程序咁，究竟搞邊科？事隔兩周，最終都係去番由特首辦回覆，但被批評一味官腔無新意。狄嘅黨友黃俊瑯仲批評文化體育及旅遊局楊潤雄唔肯見面，連影都無埋，黃強調之後會再搵康樂及文化事務署跟進，唔會畀事件不了了之。

事緣狄志遠早前去信特首辦跟進紅館意外事件，但有關信件先被轉介至文化體育及旅遊局，局方其後又轉發畀康文署，而最後電郵竟交由1823代為接收，直情令人摸不着頭腦，亦都引起網民身有同感嘅經歷。

喺兩星期後，政府前日再次歎慢板回覆，以行政長官私人秘書名義去信狄志遠，指跨部門工作小組正就MIRROR演唱會事故進行調查，由於調查工作現仍在進行中，故未能於現階段透露有關調查詳情，待報告完成後，政府當局會交代調查結果及建議方案，避免發生同類事件。之不過，由於回應無任何實際內容，搞到同樣有份向政府發信、狄志遠嘅黨友黃俊瑯好唔滿意！

楊潤雄拒絕見面

呢次紅館意外，文體局喺事件中有重要角色，黃俊瑯話佢哋都約過同局長楊潤雄見面，想跟進件事有乜嘢進展，但局方拒絕見面，話係「一視同仁」，連其他議員都唔見。佢話局方無理由唔知意外事故嘅進展，應該盡快出嚟文代，而唔係好似將件事拋嚟拋去咁。

雖則局方封咗道門，但黃強調下階段會繼續跟進事件，要求康文署應定時更新調查報告，令公眾可以得悉進度。所以話呢將個波拋嚟拋去，但始終都要面對公眾㗎！唔知今鋪康文署署長劉明光點拆招呢？