政情：擺脫拉布 立會重返正途

梁君彥話過去立法會常處於政治風眼，以往有風吹草動，立法會就捲入當中，而過去幾年有部分議員對政府不滿，會作出唔檢點嘅行為，例如叫囂、掟嘢、濫用議事程序，拖慢立法會進度，民生草案受到「拉布」影響，佢更形容以往嘅立法會為「癱瘓」。

2019年因修訂《逃犯條例》，爆發連串社會衝突。梁君彥話有關事件大大打擊國際喺香港投資嘅信心，亦重創香港工商界，但全國人大極速通過《港區國安法》，又通過完善香港選舉制度同貫徹落實愛國愛港者掌政，效果立竿見影，社會重拾穩定。佢話立法會告別「立場先行」嘅議會，議會氣氛改善，變得實事求是，又以「前廳交流會」作例子，證明立法機關行之有效，推動本港經濟發展喎。

仲記得佢以往做年結時，總係會有呢句「驚濤駭浪」，外界可能會話年年都係呢句，畀啲新意好唔好？但對於身在風眼當中嘅佢，唔用呢句又真係好難表達佢嘅感受。其實，佢早幾日寫過篇文章，憶述佢曾經走過「驚濤駭浪」嘅日子。

由19年前佢喺2003年加入立法會講起，佢話當年嘅議會「有規有矩」，但去到2008年第4屆立法會開始，議會文化就開始變形走樣，有啲議員為表達對政府的不滿，喺會上做出唔檢點行為，混亂場面無日無之；到咗第5、第6屆立法會，情況更變本加厲，議員愈嚟愈激，甚至使用暴力，擾亂會議秩序，包括潑灑惡臭不明物體，議員又大玩「拉布」拖慢會議進度，導致頻頻流會。

亂局令立法會陷於癱瘓，而議會外的動亂同暴力衝突亦燒入議會，喺2019年嘅社會運動中，立法會大樓被破壞。佢形容嗰時香港政局走到臨界點，中央迫不得已要「動手術」，出手完善特區選舉制度，令立法會回到正軌，立法會亦修改《議事規則》，重定「家規」，防止再被濫用咁話。