昔日東方政情：議員開聯合地辦 免力量分散
議員之間開設聯合辦事處，都係希望取長補短，將對服務市民嘅效用達致最大化。議員顏汶羽、陳仲尼及黃俊碩3人喺九龍東嘅聯合辦事處尋日開幕，結合商界、專業界及地區力量，互補不足咁話。
顏汶羽喺九龍東有8個議員辦事處，其中5個自己獨立開設，餘下有兩個與黃俊碩合辦，剩下一個則係同陳仲尼合作。顏汶羽喺社交網站表示，3人喺九龍東開設聯合辦事處，係結合商界、專業界及地區力量，互補不足，集結力量，服務好九龍東。
互補不足 一拍即合
屬於會計界功能組別嘅黃俊碩議員，除會計相關議題，亦牽涉到醫療、住屋、交通、養老等多項民生議題，而透過開設地辦接觸街坊，正正可以補充呢方面認知嘅不足。
同日，議員黃元山同李鎮強喺南區黃竹坑嘅聯合辦事處亦正式開幕。李笑言，自己同黃元山可以話係「黃才李貌」，指對方德才兼備，自己則「靠樣搵食」喎。李又提到，黃擅長政策研究，而自己則有多年地區服務經驗，執行力方面有優勢，二人可謂一拍即合。
黃元山則指，議會工作及智庫工作既一脈相承，亦相輔相成，如何令智庫嘅倡議落地係佢嘅目標。而南區係一個多元化社區，既有寮屋、公屋，又有豪宅、商業區、工業區。因政府正推進「躍動港島南」計劃，有公屋重建、工廈活化等項目進行，社區正經歷一個蛻變嘅過程。黃仲話會積極為市民謀求福祉。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
