昔日東方政情：參賽扒龍舟 梁熙等到入秋
扒龍舟本係端午節嘅習俗之一，但如今要入秋後先舉辦。東區龍舟競渡大賽喺疫情之下，連續兩年停辦，至尋日終於復辦。議員梁熙就初次落水參加比賽喎。而有建制派小花之稱嘅東區前區議員植潔鈴亦係佢尋日嘅隊友。
3隊競逐 「勇奪」季軍
梁熙提到，自己多年來都係做觀眾，今次係第一次落水，雖然之前曾有幾次練習，加上日日都有做運動，但去到真正落場，至發覺唔係講笑，好快就攰，同其他大大隻嘅龍舟健兒相比，真係有所不及咁話。而佢參加嘅東區民政事務署聯隊最終喺決賽拎咗季軍，總算有個交代喎。之但係同場競逐只得3隊，佢笑指隊伍表現非常穩定，一直穩守每場賽事嘅第一名，不過係由尾數上啫。
梁熙又話，今次東區龍舟競渡大賽可以復辦，全靠各個部門積極討論防疫措施，並多次開會商議，希望今次成功舉辦，其他區嘅龍舟大賽都可以陸續復辦，仲可以有觀眾，回復熱鬧嘅盛事！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
