政情：盧偉國：修訂職安健罰則 罰款額咪隨口噏

盧偉國日前出席網台節目，談及今次修訂，勞工處建議可循公訴程序定罪者，最嚴重可罰款1,000萬，監禁兩年。但佢指出，兩、三年前政府曾向業界表示，建議罰款係營業額一成，但最高唔超過600萬。對於職安健罰款同營業額掛鈎嘅主張，盧表示不解，而當局嘅解釋，話係參照競爭法而得出依營業額罰款嘅建議。盧即場駁斥當局嘅講法，指競爭法同職安健不可類比，事關違反競爭嘅目的，係謀求更多經濟利益；然而承建商謀求更多生意，係唔會刻意造成意外，況且有工業意外嘅紀錄，仲會影響到日後落標添！盧話當局見拗佢唔過，曾一度建議將罰則提升到5,000萬，但後來呈交議會審議，又突然縮水至1,000萬。到底罰款600萬、5,000萬還是1,000萬，先至可以形成足夠阻嚇？盧話希望府政府解釋清楚，唔好「隨口噏」囉。

講起修訂職安健條例，話題難免涉及近日多宗嚴重工業意外。盧偉國坦承各行各業中，建造業嘅奪命意外比率佔最高。但佢強調業界多年來都努力提升安全水平，地盤管理亦有長足之進。雖然廿年來嘅意外率逐年降低，唯獨死亡數字仍然徘徊喺一年廿宗左右。盧話每當有奪命意外發生，業界中人既難過又沮喪，大家不禁反思問題何在？而政府加重罰則，又能否杜絕工業意外呢？

盧偉國話屋宇署、勞工處、建造業議會，都有就地盤監督作業，或相關器材操作而制訂守則及指引，而呢啲資料亦早已見諸網絡，但點解仍然會出事呢？皆因麻痹、疏忽、大意囉！盧以早前嘅沙井意外為例，指即使已提供安全設備，但唔知點解會「鬼掩眼」，貪方便略去應該做嘅程序，以為落去做少少嘢唔怕嘅，點知咁就出事嘞！盧話安全文化唔係單靠僱主或專業人士，而係包括管理人員同前線工友共同形成㗎。雖然港人工作講求效率，但其實好多意外都係貪快所造成，所以真係要停一停，Check一Check，確保安全先至開工。畢竟疏忽大意，就算立咗例都唔可以防止悲劇發生。