政情：立法會新餐廳開張議員捧場

立法會大樓餐廳由新營運商接手之後，尋日開始試業，好多議員都去試頭啖湯。議員梁美芬（Priscilla）就同埋立法會研究推動國民及國安教育小組委員會部分委員，如鄧飛、郭玲麗、陸瀚民等人共聚早餐，期間仲巧遇立法會秘書長陳維安添。正所謂相約不如偶遇，秘書處把握機會即場查詢意見，到底議員對新餐廳有何評價呢？

大讚設計優雅有餐安樂茶飯

在場議員嘅回應好簡單，豎起拇指畀個like。雖然免不了「打氣」、「加油」等嘉許說話，但新營運商喺餐廳所特設嘅議員專區，一眾議員都相當欣賞，大讚設計優雅，即使議員嘅隨行賓客亦可使用。Priscilla期望餐廳新營運商接手之後，立法會大樓嘅同事又可以喺忙碌嘅工作中有餐「安樂茶飯」喇！

議員楊永杰亦有發文，指立法會一帶「搵食」有難度，幸好喺復會前新餐廳能及時投入服務，令大家有多一個選擇。佢仲話自己今日遲咗去，想叫薑葱霸王雞時已沽清。至於食物味道，佢就用「可以」兩字，相信係同新餐廳奉行少鹽少油，兼顧美味與健康嘅原則有關。

議員陳祖恒就同幾位黨友去餐廳歎下午茶，佢自己就點咗沙爹牛肉麵「醫肚」，水準相當唔錯，仲多謝黨友們準備生日蛋糕為佢提早慶生，預祝加入議會之後嘅首個「牛一」!