昔日東方政情：申建電競館 南華會遇阻力
有見電子競技成世界潮流，位於加路連山道嘅南華體育會，打算喺會所北面興建一座樓高9層嘅電子競技體育館。計劃尋日提交灣仔區議會討論時，有區議員指南華體育會連電競隊都無，好難說服佢哋同意興建相關嘅硬件設施；同埋亦有反對聲音指，憂慮電競館落成之後，會對鄰近交通構成壓力。
區議員叫先組隊訓練
灣仔區議會副主席林偉文認為，南華會並無電競隊，建議應先組織電競隊訓練，再去考慮建設訓練中心。另外，林又關注附近人流及交通流量問題，事關該地段附近將有法院及商業大廈落成，但道路交通並無改善，擔心大球場有活動時，「附近會塞到爆晒」。至於區議員李碧儀則關注南華體育會，會否舉辦電競國際賽事，仲話係咪應該做番本業更加好呢？
雖然得唔到區議員支持，但南華體育會代表黃亞鍔表示電競潛力相當大，傳統運動亦可結合電競項目。佢話曾諮詢業界意見，電競若要喺香港急速發展，必須有訓練場地；又強調組織電競隊，同興建電競中心可同步進行，因為電競中心興建需時，兩者並無衝突。睇嚟項目想過關，仲有好多細節位要大執喇！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
