政情：殘留字眼不合時宜 法律去殖莫遲疑

過去由於中央因循一國兩制而未有鞭策，港府又得過且過，導致問題積重難返，人心漸行漸遠。議員陳曼琪（Maggie）分別去信律政司司長林定國、政制及內地事務局局長曾國衞，以及立法會司法及法律事務委員會主席廖長江，要求港府加快完成本地法律「去殖民化」。Maggie指香港主權回歸已經25年，喺「愛國者治港」嘅大原則底下，本地法例仍殘留有關「女王陛下」及「國務大臣」等殖民地字眼，有必要盡快修訂，以維護《憲法》權威及正確反映香港特別行政區嘅憲制秩序，讓「一國兩制」行穩致遠。

佢又指港府有責任向市民報告律政司落實本地法律「去殖民化」嘅計劃進度同具體時間表、路線圖，同埋有關政策局與律政司配合嘅情況。

其實立法會喺5月23日召開嘅司法及法律事務委員會，會上曾就香港成文法「去殖民化」嘅進展作系統性檢討。當時Maggie就建議律政司與各有關政策局盡快完成香港成文法「去殖民化」，喺正確嘅憲制同法治秩序下，讓香港法律更清晰、精簡同易用；而檢討不僅要考慮立法原意，更需強調及重視「一國兩制」下，全國性法律高於香港本地法律的基本法律原則；若全國性法律與本地法律存在差異，當然須以全國性法律為準。

Maggie又提到，持續近3年嘅疫情，好多港人未能親身前往內地銀行辦理個人資料更新手續，導致內地銀行戶口被凍結。佢建議有關當局同內地政府協商，並與內地嘅銀行溝通，透過視頻核實居港嘅內地銀行戶口持有人嘅身份及個人資料，協助受封關所限而不能親身到內地嘅港人，重新啟動遭凍結嘅內地銀行戶口。