政情：渣馬告吹 鄭泳舜寄望明年

香港渣馬告吹，有輿論形容將機會拱手相讓新加坡。但Vincent指，其實新加坡多年來都有舉行渣馬，只不過礙於疫情，過去兩年停辦實體賽事，今年復辦就遇上香港渣馬取消，才特別惹人注目。而佢都曾經跑過新加坡嘅渣馬，但規模較細，同埋起步時間非常早，以避開當地嘅酷熱高溫。由於溫度影響運動員嘅發揮，因此全年都係夏天嘅新加坡，其實唔係咁吸引國際級跑手，相對而言，香港條件就較好。其實入秋之後，本港即將舉行港足對緬甸嘅國際友誼賽、國際7人欖球賽等，而其他嘅體育賽事，譬如佢尋日參加嘅水陸兩項鐵人賽，都可以按政府防疫規定嘅前提下，如期舉行。

有「水哥」之稱嘅長跑達人張樹槐，前晚（17日）就聯同公務員事務局前局長聶德權、中文大學醫學院行政總裁馮康及其千金，商經局前政助馮海容等人一齊喺九龍區夜跑。聶德權喺社交平台留言話「希望香港在體育發展上有智慧、有勇氣、有魄力加把勁」，似乎意有所指咁喎。水哥就話好多跑手都「餓」咗好耐，又認為香港舉辦大型長跑賽事嘅條件，較新加坡優勝，若渣馬可以喺明年年初舉行的話，應該為一眾跑手所樂見。之不過，水哥指大型長跑賽事籌備需時，故政府宜及早決定。