政情：計分上樓 單身申公屋奢求 青年等到變白頭

「單身人士申請公屋，無40年都上唔到樓」招國偉指網民呢兩句留言，相信唔少單身一族都有同感，事關申請公屋，單身人士須按配額計分制，即是話必須累積一定嘅分數，方可進行資格審查以及分配上樓。而申請人嘅起始分數，就由18歲得0分開始計，之後每一歲加9分，即19歲有9分、20歲有18分。之但係，呢個申請人嘅起始分數比較特別，招國偉話佢係負12分，相信係申請人目前正隨同家人居於公屋單位。按機制，非長者單身人士而又住喺公屋，申請人一開始就要倒扣30分，同負12分相抵銷之下就得出申請人今年只得20歲嘅推斷。

至於分數嘅累積，就喺基於年齡嘅起始分數上，其後逐個月加一分，即係每一年多12分。到底要儲夠幾多分先至可以上樓呢？根據房委會網站顯示，截至今年7月底，非長者單身人士申請公屋，要有423分先至獲得安排詳細資格審查，然後至輪到排公屋單位；而巿區編配房間至少要435分、擴展巿區係450分、新界及離島就要451分。招話睇番呢個由負12分開始排隊嘅個案，如果單身狀況不變，一直咁排落去，要入住新界及離島嘅公屋，至少要排38年零7個月！屆時已成為青春不再嘅中年人，黑髮都等到變白頭啦！

不過，招國偉話計分制有一個特別安排，申請人年屆45歲可額外加60分，變相令排隊縮減5年，換言之，申請人等33年左右就有機會上樓。然而時間之漫長，無論點講都係非常之誇張，況且呢個結論係以上樓分數不變為前設，若果上樓分數上升的話，時間必會延長。如果唔想等咁耐，就只有結婚，或者同兄弟姊妹一齊申請，可以話年輕單身人士上公屋實屬奢望。招國偉話政府一再強調關注青年人創業、事業、置業等發展情況，佢話會留意下個月嘅施政報告，睇吓青年人住屋方面，政府會否提出針對性嘅新措施。