昔日東方政情：紡織業疫市難開單 鍾國斌盼先通外關
疫情持續，經濟低迷，工商界叫苦連天。紡織及製衣界前議員鍾國斌尋日出席節目時話，紡織業好多都靠出口，疫情下部分工廠連一張單都冇，捱到今日未執笠都算係好難得，然而業界已紛紛削減員工，如果要香港有機遇，就要先恢復元氣啦。
依家香港對內地、海外都未通關，鍾國斌話最理想當然兩個關都通晒，但依家未能同內地通關，就應首先通海外關，反問香港作為國際城市，點可以長期唔同國際接軌呢？佢又話社會成日話要引入人才，但首先就應該要留住自己人，然後開關、自由流通、穩定先可以吸引到外來人才。
睇死金融峰會唔多人嚟
至於實行中嘅「3+4」防疫措施，鍾國斌話希望11月會放寬，皆因「3+4」令好多展覽都冇人嚟睇，好難做生意。另外，佢認為11月金融高峰會都唔會有好多人嚟，因為始終啲大財團、大老闆日理萬機，無意接受隔離耽誤寶貴時間咁話。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
