政情：民主黨人財兩空 轉軚味濃

羅指區議會並無改變嘅需要，呼籲政府要尊重制度，容納不同嘅政治光譜，況且區議會係以民生為基礎，對市民表達意見好重要，如果下屆區議會沿用現有制度，佢哋一定參選。然而涉及太多變數同可能性，現時好難畀到定論。

之不過，白鴿黨嘅黨務可以延續幾耐，實在不無隱憂。事關身為主席嘅羅健熙涉及2019年理大事件非法集結案，案件本月開審，或有機會罪成入獄。雖然佢表明「願意繼續去頂住呢個位（主席）」，但若果判囚時間較長就另作別論，至於能否得到黨友嘅支持，佢坦言話無把握，話問題比較難答，最好問番佢哋（黨友）。佢強調自己只能夠盡力去做能力所及嘅事。到底白鴿黨會唔會解散？佢話唔係黨入面所討論嘅範疇，指黨嘅好壞應留待社會去評價。