政情：首位法律界議員訪京 林新強探尋港律師前程

講緊嘅就係Ambrose係自1997年後，首位立法會法律界議員訪問北京，睇番過往紀錄，該功能界別嘅議員一直由泛民主派或獨立人士擔任，而喺回歸後，佢哋都冇用呢個身份訪京。

Ambrose早前先去浙江完成內地嘅檢疫隔離政策，之後喺當地再逗留5日訪問，繼而再去北京逗留多5日。佢話以前考察係以業界監管身份，今次個身份改變咗，希望將香港法律議題帶返內地討論，仲形容多場嘅會面同研討會都反應正面。佢仲引述內地嘅法律人才對香港司法制度都有好大興趣，亦都願意學習。但佢亦指兩地文化有差異，亦都行緊唔同嘅司法制度，內地嘅法律人才學習上有一定困難，因為法律並非單純牽涉語言，亦都同文化息息相關。

之不過，有危就有機，佢建議將兩地律師事務所做大做強，先可以保護企業同民眾走出去。佢又鼓勵更多內地企業同香港中小型律師事務所展開業務合作，佢亦都好歡迎國內企業來港上市。佢亦提到香港律師事務所同已考取大灣區執業資格嘅香港律師，與內地律師事務所合作，喺大灣區等自由貿易試驗區作合夥性聯營所。而喺北京期間，佢話見識到國家嘅司法改革和數字化嘅情況，認為好值得香港法院借鑑。

行程咁緊密，有冇趁空閒去玩先？佢就笑言都係以公事為主，但都有出席一啲電動車嘅展覽，睇吓搵唔搵到心頭好。佢亦都講到最深刻嘅就係內地嘅防疫政策，話相當嚴謹，基本上幾日就要做一次測試，又話內地嘅檢測人員已經做慣做熟，所以「殺傷力」都大大減少，冇咩唔舒服嘅情況發生。原本佢仲打算去埋深圳，奈何當地疫情反覆，惟有就此結束旅程返港。