政情：中秋酒店隔離 何俊賢改詩呻悲

話說前晚係中秋，月滿之夜亦係團圓之時，但係喺酒店隔離嘅高佬賢就灰爆。佢喺社交平台上載咗張相，係佢飲住啤酒，放咗個月餅喺窗邊，隔住酒店窗厚厚嘅玻璃，望住天上明月，貼文劈頭第一句就話「今年中秋食自己」。跟住就引咗幾句詩「花間一壺酒，獨酌無相親。舉餅邀明月，回頭剩一人。」

其實呢首詩頭嗰兩句係出自唐代李白嘅《月下獨酌》，但最後嗰兩句本應係「舉杯邀明月，對影成三人」，但高佬賢就二次創作，「杯」變「餅」，「對影成三人」變咗「回頭剩一人」，好明顯係話冇得同家人團聚好孤單喇！佢最後仲加多句「隔離酒店獨徘徊」添！唔知佢前晚徘徊咗幾耐呢？

呢幾句詩係寫詩人由獨酌，跟住運用想像力，變成自己、明月同影子，就由孤獨變成唔孤獨。劉國勳都引咗呢首詩，喺社交平台貼文話帶備月餅去檢疫，一個人原來都可以盡興，仲反問大家有冇讀過呢首詩呢？講完即刻醒起暴露咗年齡添！