政情：青年工作欠佳 梁毓偉倡設KPI

雖然有人擔心KPI會流於形式，但梁就指出，其實可以根據現行嘅一啲數據而評估，包括青年嘅入息中位數、某啲專業界別嘅青年就職人數百分比、青年置業率，短期上提供參考。至於政府制訂中嘅青年發展藍圖，梁認為日後需定期更新，為青年人度身訂造一套理想嘅發展方向。

而政府早前亦公布咗具先導性質、支援2,000位劏房戶初中生嘅計劃，目標係透過友師配對分享人生經驗。梁似乎都對計劃有興趣，有意成為「友師」嘅一員，因為佢都想落前線，聽吓學生對議員嘅睇法。佢仲話會叫埋辦事處嘅職員參加，或者會掀起學生對從政嘅興趣喎！此外，梁仲透露，佢嚟緊會開首個地方辦事處，地點就當然設喺具青年氣息嘅柴灣青年廣場，不過仲同緊「孖頭」嘅議員商量緊，究竟佢同邊個合作，就暫時賣個關子先，遲啲先揭曉喇！