政情：染疫變新人類鍾禮謙唔知經手人是誰

沙田區議會主席麥潤培上周二（6日）出席事務委員會，翌日做快測發現確診，當日與會人士皆有染疫風險。其中區議員鍾禮謙上周三做快測冇事，形容自己未曾中招，唔係「新人類」，唔想「經手人」係麥主席喎。殊不知當日嘅戲言竟一語成讖，佢尋日宣布染疫，逃不過成為「新人類」嘅厄運。

麥潤培上周確診有嫌疑

鍾禮謙喺Facebook指自己終於成為新人類。身體方面係暫時退咗燒，不過仲有喉嚨痛，尋日起床嘅聲線仲磁性過音樂情人。而中秋假期後，辦事處職員會先做檢測，確保冇染疫先至再服務街坊，又提醒大家記得保持基本個人衞生，毋須過分緊張，好好享受中秋假期。而佢自己亦終於有時間可以睇番以前買落嘅書咁話。至於「經手人」係咪麥潤培？佢就話病毒四圍都係，搵返邊個係經手人都無意思喇。

林素蔚3次快測呈中招

另一方面，議員林素蔚亦快測中招。佢尋日喺Facebook發文，指作為議員，每天都需要跟進不同個案、接觸不同人士，每天兩次快測、一個星期一次核酸檢測，已經係不可或缺、保障身邊親友嘅必備動作。但前日自己使用3個不同牌子嘅快測劑，結果皆呈確診，暫時只有喉嚨痛、頭痛等病徵。林又指，為保障其他人嘅健康安全，自己呢幾日需要居家隔離，直至快測連續兩日顯示冇病毒。適逢中秋佳節，林祝願大家節日快樂之餘，亦要緊守防疫。