政情：環保新創舉回收快測包林超英教分類

為咗環保，到底可以去到幾盡？素有「環保達人」之稱、堅持唔開冷氣嘅天文台前台長林超英，留意到每日有百萬計嘅市民會做快測，並由此形成大量廢物，於是佢透過社交平台分享一項環保新創舉，就係回收快速抗原檢測套裝。之不過，唔係所有配件都有循環再造嘅價值，究竟邊啲可以回收呢？

說明書小膠樽唔使丟

林超英認為快速抗原檢測套裝用完即棄，淪為大量垃圾，未免可惜。佢主張部分物料應可回收，譬如紙盒同說明書，可以作廢紙回收。再者，若檢測結果唔係中招，可以將測試膠盒拆開分成兩片，移除及丟掉入面嘅試紙。至於盛載測試液嘅小膠樽就可以清倒掉，然後用番梘或者清潔劑洗淨測試盒同小膠樽，再置於太陽底下曬乾風乾，咁就可以當作廢膠回收。至於難以回收嘅探鼻棉棒同其他包裝物料，就無謂勉強喇。林超英重申，如果檢測結果係呈確診嘅話，全部物料都要丟棄。

就回收快測包嘅主張，網民評價不一。有留言指「每日幾百萬個口罩變垃圾仲講咩環保？」「咩叫源頭減廢？」亦有網民指出「包裝盒往往是有一層膠的紙，不去除膠層，便不適合回收再循環了」。林超英今次嘅建議是否行得通，睇嚟就真係見仁見智喇！