政情：葛珮帆隔離酒店度中秋隔住電話解思愁

中秋佳節，最好莫過於人月兩團圓。啱啱結束外訪行程嘅議員葛珮帆（EQ）雖然已經返港，不過就要入住隔離酒店，唔能夠同家人一齊度過佳節。咁有乜嘢方法「補救」呢？佢話惟有使用視像，夜晚隔住個「芒」同老公食月餅。可謂「同在香港這麼近」，但「隔離感覺那麼遠」咁話。

EQ早前隨同議員黨友出訪印尼，前日（9日）踏上歸途返抵香港，並按「3+4」防疫規定而到隔離酒店暫住。EQ話入境檢疫過程順利，希望香港盡快復常，如可確保精準防疫嘅前提下，都想盡快實行「0+7」嘅隔離方案，咁就可以提早返屋企喇。然而疫情依舊嚴峻，單日確診個案成千上萬，無奈要喺隔離酒店獨自度過中秋，但幸好喺印尼買咗個月餅，酒店又送咗個燈籠，總算係有啲過節氣氛。縱使未能與家人共聚，都可以同老公開住視像食月餅，一解相思之苦。

議員梁熙都有份出訪印尼，雖同EQ一樣都要入住隔離酒店，但佢話相當珍惜呢段時間，因為終於有時間休息喇，仲諗住每日瞓夠8個鐘添，而隔離期間嘅工作都盡量以視像形式進行。梁話明白好多人都希望隔離方案可以放寬至「0+7」，但都需要睇數據。至於點樣度過中秋？佢話尋晚打過電話返屋企，而咁啱又撞正議員黃英豪媽咪嘅生日，幾位議員會透過視像形式唱吓生日歌咁話。

儘管中秋賞月係晚上進行，但民政及青年事務局副局長梁宏正同局長政治助理張進樂，兩人日光日白走到戶外，喺太陽底下踩單車，理由係應節月餅食得多，要藉體力消耗還「月餅債」喎！到底要踩幾耐至可以抵銷一個月餅嘅熱量？咁就要搵專家計算喇。

葉劉派「福利」網民勁受落

往年都會趁住中秋派「福利」嘅議員葉劉淑儀（Regina），今年都冇例外，喺社交平台上載應節靚相以饗網民。除咗招牌旗袍衣着，今年更搞搞新意思，特登搵嚟巨型月亮做場景。然而美中不足嘅係，月亮唔係圓月，而係選用彎月，同寓意團圓嘅中秋有啲不符。之但係，網民依然十分受落，話Regina着得好靚，詢問可否下載靚相做電腦背景圖添。