政情：被張宇人逐出會議廳 田北辰扯火：我忍咗你好耐

事緣田北辰向醫務衞生局局長盧寵茂了解，有關入境人士檢疫政策會唔會進一步放寬至「0＋7」，即免除酒店隔離，只需醫學監察。而盧寵茂就話要視乎數據同入境人士嘅風險，政府正密切監察中。然而盧寵茂話音未落，就遭到田北辰打斷發言，要求提供最近嘅實際數字。主持會議嘅張宇人隨即介入「等局長答埋先，好唔好？」田北辰不滿批評，立即反駁「主席你唔使咁樣？」。張宇人跟住就指自己同田北辰共事咗好耐，見佢時時都插口，希望田北辰要有禮貌。

聽聞張宇人敦促要有禮貌，田北辰反唇相稽「我係非常有禮貌，主席，你插口我就唔覺得你有禮貌。」又要求張宇人「畀番一分鐘我。」張宇人就指自己有責任維持會議暢順運作，好堅決咁話「我唔會畀任何時間你」又強調自己並非「延燒時間」。由於兩人爭拗導致「聲疊聲」，張宇人一怒之下指示秘書熄咗田北辰個咪，警告話若繼續發言，就要請田北辰離開會議室。惟田北辰心有不甘，喺座位繼續發聲，最終張宇人要求秘書「請」田北辰離開，繼而宣布休會5分鐘。復會後田北辰已離開會議室。田北辰事後向傳媒交代事件，指發言旨在澄清事實，認為身為議員有責任監察政府，強調唔係插嘴追問。