昔日東方政情：卓永興快測再現兩線
新冠狡猾多變
病毒不斷變種，二次感染嘅機會愈嚟愈高。早前話要打擊衞生黑點、推動全港清潔運動嘅政務司副司長卓永興，兩星期前染疫之後，已經有一段時間無公開露面，點知佢喺星期一再度確診！雖則話冇病徵，但見連日來快測棒顯示冇染疫嘅一條線，竟再度出現代表染疫嘅兩條線，佢不禁驚呼病毒非常狡猾、防不勝防啊！
卓永興尋日喺社交專頁談及確診感受。佢話喺8月26日確診，起初病徵並唔明顯，但過咗半日之後，就忽然發起高燒。服藥後翌日，高燒雖然減退，但開始猛烈咳嗽，喺5日後病情終於退卻，快測亦連續幾日顯示冇染疫，於是打算喺星期一返回政總，再次與同事並肩工作之時，點知做快測嘅結果竟然係染疫。
儘管今次唔覺得有病徵，但佢亦要繼續居家隔離。而再度確診嘅經歷，令佢深感新冠肺炎病毒非常狡猾、防不勝防，又話病毒變種Omicron絕對唔係傷風感冒。佢又強調自己幸好已經打咗4針，先至抵禦得住病毒嘅衝擊，否則後果可以好嚴重。
袁國勇首中招勁阿Q
講到尋日朝早做快測，佢話仍然出現兩條線，但第二條線已經好微弱，相信好快就可以聯袂同事到前線打擊衞生黑點。佢又呼籲長者，若果不幸染疫必須通報當局，醫院管理局會安排電話或視像診症，並提供特效藥物。
要居家隔離嘅仲有政府專家顧問、港大微生物學系講座教授袁國勇。佢前日亦確診，尋日接受傳媒查詢時話自己冇出現症狀，感謝大家關心，又話3年嚟可以放假都係好嘅，又話期待數日內重回工作崗位添！之不過，佢會唔會好似卓永興咁，重返工作崗位前做快測又再出現兩條線呢？咁就不得而知喇！
袁喺確診前曾出席公開活動，就係上周三物業管理局「物管先鋒」嘉許典禮，期間佢曾祝福較早前據知確診嘅衞生防護中心傳染病處首席醫生歐家榮早日康復，估唔到事隔一周就輪到佢中招。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
