政情：麥潤培中招 同事乘機取笑

麥潤培於社交專頁貼文，話自己尋日用咗兩個唔同牌子嘅快測棒，結果都顯示係確診，呼籲跟佢共事者做檢測。沙田區議會前日舉行「文娛康體及社區設施管理事務委員會」，理論上與會者都有中招嘅風險，其中又以區議員許立燊較高危，事關會議後佢曾駕駛車輛接載麥潤培。而許立燊尋日做快測嘅結果就係無染疫，點解許同麥兩人「同車」，咁近距離都可以幸免呢？許就喺社交平台貼文話「可能因身高差及強健體魄」，又強調自己「一切並無異常」添。雖然無染疫，但為穩陣起見，許話暫停返辦事處，而議辦亦已進行消毒，所有職員快測都係無事。

鍾禮謙係另一位前日有份出席會議嘅區議員。鍾禮謙話得悉麥潤培染疫嘅消息，於是自行撩鼻做快測，暫時所得嘅結果係無染疫。之不過未來幾日，佢都會繼續監察身體。跟住佢又留個Hashtag（主題標籤），話自己仲未係新人類，希望經手人唔係麥主席。照佢咁講，豈不是慶幸今次避過一劫？另一區議員鄭仲恒前日都有開會，佢話成個馬鞍山都知麥潤培中咗，而佢得知消息之後亦立即自行檢測，結果係冇事。佢強調未來幾日都會自行做檢測。