政情：立會多毛病 維修料月中完成

話說立法會會議廳外形儼如「飯煲」，天台就好似「煲蓋」。據建築署講解，因「煲蓋」呈曲面設計，駁口多且複雜，加上物料日久老化，增加圓形排水渠滲漏嘅風險。不過，建築署維修時，將於排水渠同埋矮牆塗上防水塗層，同時改善去水孔設計。

另外，3樓公眾席玻璃幕牆經常因濕氣而起霧，建築署添加吸濕物料，喺玻璃中空位置進行抽濕，終於都搞番掂。梁君彥話將來天花板唔會再漏水，玻璃亦回復清晰明亮。佢多謝建築署同立法會秘書處協作，令工程可以提早於9月中之前完成咁話。