政情：愈窮愈見鬼民主黨獻世

立會無席位認知度創新低

得民心者得天下，但空有豪言卻乏政績，又點樣得到市民嘅支持呢？有調查機構尋日公布最新嘅政治團體評分，大部分認知率高嘅政團，評分都喺50分以下，連「掹車邊」合格都冇，就好似排首位嘅工聯會，得分都只係44.5分；而曾經係泛民主派龍頭嘅民主黨，目前深陷財困兼人才凋零嘅局面，評分更僅得38.4分，為該黨於1994年4月創黨以來，有紀錄嘅新低，恐怕離亡黨之期不遠矣！

香港民意研究所喺今年8月4日至9日，以隨機抽樣電話訪問方式，成功訪問502名香港居民。最新調查顯示，市民對政治團體嘅最新支持度排名，第一位係工聯會，得分為44.5分，第二位至第五位順序為民建聯、新民黨、自由黨同民主黨，分別得42.7、41.7、40.8及38.4分。至於躋身「五大政團」嘅先決條件，係市民熟悉程度，然後再按支持度排名。至於只得39.9分嘅公民黨，已非市民最熟悉嘅政團，並因認知率較低而被剔除，跌出榜外。

議員火速轉跑道失民心

數據反映，雖然建制政黨主導咗新一屆立法會，以及殘缺不全嘅區議會，而部分政黨即使作風出位，但成效不彰，市民對於其議政方式仍感不滿，認為未能反映普羅大眾對防疫政策嘅不滿。再加上有建制派議員上任僅半年，就火速「轉跑道」加入政府，都予人一種「𢭃份糧」嘅觀感，咁又點樣留住民心呢？

至於近年元氣大傷嘅民主黨，其營運資金已接近「乾塘」，可能只夠捱到今年年底，皆因黨內立法會議席已「清零」，區議員只剩7人，再加上需「泵水」予多名涉嫌違反《港區國安法》、正陷牢獄嘅黨友家屬，導致入不敷支，需出售黨產維持營運，深陷創黨以來最嚴峻嘅財政危機，號召力蕩然無存。至於立法會同區議會議席俱全失嘅公民黨亦趨低調，曝光率甚低，議政功能瓦解，而該黨嘅領導層將於年底換屆，到時會否轉型又或者解散仍屬未知之數。