昔日東方政情：徐英偉派飯兼外訪惹關注 被問參選 秘而不宣
人生猶如坐過山車，高低起伏少不免。就好似曾經係最年輕嘅局長之一、前民政事務局局長徐英偉，就因為今年初出席「洪門宴」，惹來口誅筆伐，最終黯然辭職，仕途或就此畫上句號。之不過，所謂山重水複疑無路，柳暗花明又一村，徐英偉喺風聲過後，繼落區派飯後，近日再隨所屬政黨嘅黨友到馬來西亞吉隆坡考察，「洪門宴」事隔逾半年，佢尋日喺網上記者會首次面對傳媒分享行程，話好多當地商人想參與香港嘅新規劃同大灣區發展，不過防疫政策要更加深度開放。徐呢排頻頻亮相，曝光率咁高，唔知佢有咩大計呢？
話有消息再講
又再活躍當然惹來公眾關注，期間議員陳勇介紹徐英偉時，稱佢為「重要成員」，而徐英偉亦都話咁多位傳媒朋友好耐無見。當被問到會唔會出選年底嘅港區全國人大代表換屆選舉時，徐英偉就選擇避談，指大家留意住其他嘢先，有消息再講，搞到大家都要繼續估估吓。
其實除咗人大選舉，立法會都仲有4個議席出缺，但徐所屬政黨早前已經有黨友「轉跑道」，由立法會跳去政府任職，包括已退該黨嘅律政司副司長張國鈞，據悉，喺今次補選，該政黨應該無份喇！而徐英偉早前已經大搞親民活動，同黨友鄭泳舜落區派飯，徐仲負責買飯票添，睇嚟都係發出緊一種積極嘅信號喇！
隨黨友去馬國
而一場嚟到馬來西亞，其他黨友都大讚該地令人感覺親切舒適，因為兩地文化好相似，仲講到有當地商界代表話好掛住香港啲叉燒喎！而議員陳學鋒亦提到當地人語言能力強，對香港同大灣區發展都好有興趣，不過最大障礙嘅檢疫期，政黨都表示要平衡風險，限制太多都唔好，因為要增加香港競爭力，未來會將會面成果反映比政府知。
陳學鋒仲提到有當地珠寶商人話，過往香港舉辦嘅珠寶展覽對整個行業有好大幫助，佢哋願意再來港。至於陳勇就話今次行程了解到當地人意見，亦希望可以促進佢哋同香港之間的貿易。
本文連結 : https://orientaldaily.on.cc/content/要聞港聞/odn-20220906-0906_00176_401/政情：徐英偉派飯兼外訪惹關注--被問參選--秘而不宣
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
