政情：久違出訪東南亞 議員興奮冇有怕

李世榮提到，佢哋一行人甫落機就順便參觀雅加達機場，又發現當地的士都係採用中國比亞迪電動車，特別有親切感。又笑指最緊要係，落機花咗50萬元印尼盾，約264港元繳交入境稅，啲銀紙好多個零呀。而出訪馬來西亞嘅劉國勳就表示，佢哋會拜訪當地商會、專業團體、青年組織及投資者。佢話，馬來西亞天然及旅遊資源豐富、新加坡城市規劃有系統，承諾向當地取經交流之餘，亦會向當地商會介紹香港北部都會區嘅發展，邀請大家到北部都會投資及建設咁話。

至於抵達越南嘅議員陳恒鑌就話，大家對越南嘅第一印象可能係多種特色美食，但香港與越南嘅經貿交流並唔係只有食品，又指越南係東盟國家中，人口最年輕、增長最快嘅經濟體之一。近年疫情爆發，唔少經濟體都有負面影響，但外商喺越南嘅直接投資仍穩步增長，而本港目前係越南嘅第5大投資來源地。香港擁有強大嘅專業力量，從金融服務、跨境物流到設計行業，都有能力協助越南企業開拓內地以至整個亞洲市場，並能協助佢哋把握「一帶一路」和粵港澳大灣區發展優勢，帶動整個區域共同發展。相信隨着港越經貿活動深化，兩地喺文化、藝術、旅遊等方面，將可拓展更大合作空間，發展更緊密嘅互利關係。