政情：聶德權病愈出關 即跑10K冇偷懶

聶德權喺社交網站上載喺沙田城門河畔跑步嘅相，又貼文話終於可以出街跑一轉啦！咪以為佢係咁意跑吓，都跑咗10公里呀！明顯係心肺強，好夠氣。佢仲多謝朋友嘅關心同支持，話打咗3針，症狀輕微，用中西藥合璧，而嗰段日子唔出得去，惟有喺網上訂餐購物，終於順利完成7日隔離。

呢則貼文出街之後，唔少網友包括前同事、財經事務及庫務局副局長陳浩濂都叫佢繼續加油，而醫院管理局前行政總裁梁栢賢（PY）仲問佢係咪為馬拉松備戰，但另一網友就質疑唔知仲會唔會搞馬拉松嘞！又難免會咁講嘅，事關因疫情升溫，好多大型體育盛事要限制人數，有啲甚至因而取消，令唔少市民失望。