政情：中美博弈 更要積極 何啟明籲港青裝備自己勿躺平

何啟明指香港過去受惠內地改革開放以及冷戰嘅紅利，呢種「歲月靜好」嘅時代已經結束，反而中美博弈令香港成為雙方嘅鬥爭之地。佢認為「黃」雖則欠統一嘅標準，但不外乎親西方價值，喜歡自由民主，但不管意識形態如何，「藍又好、紅又好、黃又好」皆有其值得學習之處，相信未來會回歸實用主義，會包容唔同人士嘅想法「邊個搞掂張單，邊個搞掂個目標，唔理你黑貓白貓，捉到老鼠就係好貓。」

提到指國際地位東升西降，佢話大家必須要對新時代有新理解，認識到百年未有之大變局中嘅機遇。何啟明建議後生仔，睇多啲央視同抖音，話本地傳媒鋪陳嘅世界觀，同美國等西方國家類似，較諸央視及俄羅斯媒體所講嘅，簡直係兩個世界，所以要睇多啲不同嘅資訊。佢仲建議後生仔要鑽研一門手藝，例如cosplay，話年輕人要好好裝備自己先可以同全世界競爭，仲寄語青年人要喺社會工作吸取經驗，唔好「躺平」嚟應對生活嘅不如意咁話。

議員嚴剛都有出席研討會，佢話青年發展關係到香港未來嘅競爭力、社會發展嘅多元同和諧。但礙於香港經濟結構相對單一，青年面對上流通道狹窄嘅現實問題。雖然徹底解決需要用較長時間，但都唔可以「議而不決」，必須為青年提供更多、更廣同更優嘅就業選擇。當然，青年自身亦要充分規劃，須努力提升競爭力。

創新科技及工業局局長政治助理廖添誠，指現今國際局勢雖然風雲莫測，但作為國際都會嘅香港，青年人仍有好多發展機會，譬如「再工業化」嘅主張，相較於過往傳統工業及製造業，將聚焦土地少、高增值嘅產業，更加符合香港嘅實際需要。佢強調香港最珍貴嘅資源係人才，而未來5年政府會大力注重創科「產學研」嘅結合，希望逐漸透過政策支援，社會能提高對創科人才嘅關注度。