政情：大埔區流會停不了

前副主席劉勇威遭到同屬民主派嘅區議員催促，要按協商喺出任兩年後「退位」，以畀更多人有主持議會嘅經驗，劉喺今年1月1日離任副主席，但事隔8個月，區議會大會3度流會，都未能選出副主席。

根據《區議會條例》，每次區議會大會，必須正、副主席均在場嘅情況下，方可舉行；若區議員有意競選副主席，必須取得一名區議員動議、兩名區議員和議，先可以進入競選程序。其實，民主派嘅區議員區鎮濠同譚爾培都有意競逐副主席，但一直都攞唔到足夠支持去提名。繼姚鈞豪被取消區議員資格後，令民主派區議員由6個減至5個，7月召開嘅大會已經流會，而劉勇威近日亦去咗台灣，即係民主派又少一個，由5個減至4個，買少見少，更加無法突破樽頸位。

毛家俊話依家都睇唔到有協調嘅機會，事關雙方都係攞唔到足夠嘅支持。咁大會係咪一直停擺，直至任期結束？佢話都有可能，事關睇唔到有任何契機可以令大家轉變立場，除非有一啲議題要逼到埋牆角，唔開大會解決唔到嘅事。係乜嘢？佢話可能係區議會職權檢討，因為呢件事對區議會組成影響好大。

佢話選到副主席，可以召開大會嘅話，就能夠令區議會發揮得全面啲，依家冇開大會，都有其他事務委員會可以處理，只係有關區內罪案數字，就冇辦法搵警方嚟交代，惟有靠一啲非正式嘅場合去溝通。

至於劉勇威之所以去咗台灣，佢尋日喺社交平台貼文交代，話探望喺台灣養病多年嘅爸爸。由於受疫情影響，劉無法以旅客身份赴台探親，於是就報讀台灣國立成功大學歷史學系研究院，以學生身份去嗰邊讀書，同時照顧埋屋企人。

佢又就自己離港之前，冇向街坊詳細交代而感到抱歉，解釋話事前有太多唔確定因素。但強調縱使人在台灣，辦事處仍然運作。佢又話大學方面會先修讀一個學期，預計年底就會申請休學，仲期望年底返港時可以唔使入住檢疫酒店。