政情：立會明開特別會議 討論大停電

關注事件嘅議員劉國勳，批評中電派出嘅100元心意券並唔足夠，希望扣減電費；佢又敦促設立恒常嘅事故補償機制，避免每次作出補償嘅時候冇機制可循，又強調政府喺類似意外發生時，應以緊急警報系統通知市民。

然而劉國勳明日未能親身出席會議，惟有託黨友代為發言。佢話中電要加強安全風險評估，應該安裝閉路電視，又話今次後備電都有問題，建議喺屋邨加裝儲電設施。

將出席會議嘅議員周浩鼎，就話當晚意外令元朗區大規模停電，政府同中電須再進一步解釋事故原因及預防措施。佢促請中電為電纜加添塗層之外，亦要加自動灑水系統，吸取教訓確保未來冇相類似事情發生。唔單止咁，佢亦質疑當晚後備電力供應系統冇完全運作，要求政府再作解釋。