政情：吳秋北做足防疫準備 唔怕坐何永賢隔籬

據了解，諮詢會有幾十人出席，當中有議員、智庫同地區人士。由於吳身兼工會會長，理所當然咁坐喺何隔籬主持會議。會後吳被問到，坐咗成個鐘頭咁耐會否擔心被感染？佢就話唔係咁擔心，畢竟大家都做好防疫措施，所有人全程戴口罩，會議期間無除罩無飲食，已經係盡咗最大努力啦。但為咗審慎起見，佢話散會之後都唔會安排其他社交活動，直接打道回府，而今日就會去做一次核酸檢測，睇吓結果係點喎。

講番尋日嘅諮詢會，吳就房屋問題而要求政府需要着手儲備土地，壓縮流程以加快建屋程序。至於會上有人就粉嶺高球場提出意見。吳認為政府態度明確，希望當局可按計劃落實本身嘅建屋安排。佢又指現時疫情升溫，方艙暫不適合轉為過渡性房屋。