政情：抗疫只聽專家建議 江玉歡斥漠視民意

Doreen尋日喺社交平台貼文，話疫情好似「過山車」一樣上上落落，又比喻疫情為「迷宮」，稱未有一套整體、清晰明確嘅抗疫政策，每日都只係講「齊心抗疫」。佢甚至話每日唔同嘅醫學專家分析，唔明白點解淨係聽佢哋嘅意見，提出專家委員會要加入其他金融、商業、航運旅遊業、安老、教育及青少年等持份者，令防疫政策得以平衡，使各方意見同利益得到照顧。

疫情牽連甚廣，佢亦都話留意到有傳聞話如果疫情再大爆發，可能要停面授課。佢直言咁做會影響學習模式，唔可以隨意更改，否則令一眾家長學生失預算，仲憂慮基層家庭如果又再上網課，邊個照顧到小朋友？其實江過去已多次批評香港抗疫無方向，好似一套重複上演嘅「鬧劇」，又質疑港府點解唔向其他地方嘅抗疫方法學習。