政情：過渡屋供應少得可憐鄭泳舜哦爆何永賢

過渡性房屋雖細細哋，但相對於劏房已經好好多，之不過供應量實在太少喇！根據資料，估計到2023年底前，過渡性房屋單位總數得1.7萬個咋。議員鄭泳舜尋日就約左20幾位營運過渡性房屋嘅機構代表，同埋房屋局局長何永賢坐埋開會，一齊諗吓點樣增加過渡性房屋嘅供應量同速度，等啲基層快啲上樓咁話喎。

冀政府支援社福機構

鄭泳舜話喺會面中同何永賢講，叫政府要喺嚟緊嗰份施政報告交功課咁話喎。佢叫政府增加過渡屋整體供應，仲要政府訂立目標要喺呢屆任期內起夠5萬個過渡性房屋畀市民，等佢哋可以改善吓居住環境。同埋，佢仲想政府可以幫幫啲社福機構，畀多啲支援佢哋。政府都要落手起多啲過渡性房屋，唔好要啲社福機構做晒，始終政府咁多個部門咁多個專家，無謂嘥晒啦！

講到依家有啲過渡性房屋得3層，鄭泳舜覺得太矮啦，話要起高啲先得。咁何永賢有乜回應？佢話局長聽到啲建議後，會積極跟進。

點為之積極跟進？咁就真係要放長雙眼睇啦！