政情：自稱鍾意飲茶露破綻 狄志遠汽水慢慢歎

狄志遠喺貼文話知道灣仔大榮華要結業，所以早兩個星期前就約埋班同事去嗰度開會，話要大吃一番咁話喎，又話「認識我嘅朋友都知道我好鍾意去飲茶」，仲上載咗張相為證。就係呢張相出事嘞！事關見到枱面有罐可樂呀！鍾意飲茶，喺茶樓竟然唔係歎香片、普洱或水仙，反而係歎可樂。

張相穿晒崩，難怪唔少網民都留言問佢「點解會飲可口可樂」，話佢飲緊嗰杯茶係「樂茶」喇！仲有網民留言慨嘆話，有罐嘢飲喺枱面，搞到失去咗飲茶嘅氣氛。面對一班網民咁樣踩場，狄志遠就冇回覆，唔知係咪仲飲緊可樂，諗緊計解畫呢？