政情：張欣宇巧遇林超英 唔傾天氣講客家情

大家先估吓佢哋喺邊度相遇？畀個貼士，嗰度以前有好多荔枝嘅呢！仲估唔到？開估，係荔枝窩呀！話說張欣宇日前入咗沙頭角禁區，跟住搭船去荔枝窩村，呢條客家村已經超過三百年歷史嘞！而佢哋嘅嚮導就係林超英，點解會見到佢？事關林超英一直關注荔枝窩嘅保育同推廣客家文化。

張欣宇話林超英帶佢哋行勻荔枝窩唔同隱密嘅角落，仲畀林超英嘅熱情同投入所打動，但佢對林超英分享嘅一個小故事，印象尤其深刻。話荔枝窩早一段日子幾乎冇人居住，但隨着社區活化，村落重新有番人氣，但亦都開始多咗鄰里糾紛，甚至爭吵。不過林超英反而話，當爭吵開始出現，即係搬返嚟嘅人重新開始對一個地方「着緊」，咁就係一種歸屬感嘞！

荔枝窩高峰時曾經有超過1,000名居民，過百間客家特色嘅村屋依山望海，而近年政府積極喺荔枝窩推行鄉郊保育，早前仲成立咗故事館，推廣同保留客家文化。