政情：炒車染疫打孖嚟聶德權8月好黑仔

雖然仲有幾日，8月先至完結，不過公務員事務局前局長聶德權，就已經回顧呢個月所發生嘅事。話說早前佢發生交通事故，拉傷肌肉要做物理治療；跟住又不幸染疫，喉痛聲沙徹夜失眠，都可算係「黑仔」啦。

聶德權喺社交專頁貼文，指由8月中開始，先後遇上生命中難忘嘅經歷，首先係某個雨夜，佢乘坐家人駕駛嘅汽車喺公路上「自炒」，儘管車毀人冇事，但頸同右肋骨周邊嘅肌肉就拉傷咗，要做物理治療。而過去一星期，聶因同住家人確診而需居家檢疫，誰知去到第7日輪到佢出現病徵！但由於打咗3針疫苗，症狀輕微，然而病發頭一日就感覺喉嚨好痛，聲音沙啞，兼且失眠。

豁達面對有時間煲劇

佢話疫情爆發超過兩年半，自己終於都中招！但佢又好豁達咁話，既來之則安之，感恩前後有兩星期時間實踐「靜態管理」，可以多睇書同埋「煲劇」咁話。