政情：陳家珮地辦開張 葉劉乘機向局長𢱑資源

葉劉淑儀發言時就笑言孫東要畀多啲資源佢哋，因為佢哋有咁多年輕人，亦都再三強調推動創科嘅重要性。至於孫東都未有「托手㬹」，指政策需要地區支持，舉例老人家唔識用「紅黃碼」，好多時要靠地區人士教，日後會將更多科技資源放落基層。另外，孫東都大讚陳家珮，指大家喺立法會曾共事半年，覺得佢熟悉地區事務，工作能力好，有深刻印象，好期待佢嘅表現。

至於陳家珮就有意拓展服務，地辦會陸續有來，又指東區人口眾多，辦事處都收到諸如交通、衞生等嘅求助，而最難忘嘅就係爭取港鐵無障礙通道，希望為居民追求更多健康環保生活，亦會舉辦唔同類型嘅地區活動同居民加強聯繫。