昔日東方政情：推動STEM教育 鄧飛：須移風易俗
為培育人才以應對社會未來嘅發展，本港近年興起結合科學、技術、工程同數學嘅STEM教育。教育界議員鄧飛，指教育局已就STEM教育設立一個委員會，嘗試制訂中、小學嘅STEM教育到底要掌握乜嘢創科元素、點樣融入課程裏面，之不過相關工作起步較遲，佢又認為實踐STEM課程嘅同工，亦未必具備呢種跨學科教育所需嘅思維。
指比賽多無助普及創科
鄧飛早前喺一個網台節目中指出，推動STEM教育係一個好大嘅課題，雖則本地教育界，校際STEM比賽多如牛毛，得獎學生嘅創意令人讚嘆，之但係呢類比賽嘅本質係「拔尖」，換言之，志在攞獎！但其實STEM教育講求藉相關活動提升同學對創科嘅興趣，並形成一種學習嘅氛圍，因此係「普及」而非「拔尖」。所以佢話推動STEM教育，業界某程度上要移風易俗，改變不合時宜嘅想法。
鄧飛又強調，教育需德才兼備。佢話曾有一宗真實案例，有學生自製假八達通，上巴士拍卡會發出「嘟」一聲，令人產生成功付款嘅錯覺。佢話咁做的確好有創意，但從科學倫理而言係犯法，屬於詐騙行為。所以話STEM教育都要考慮埋呢點，畢竟科學係一件利器，用得好可改善生活，相反就好得人驚啦！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
