政情：建造業唔夠人手 謝偉銓獻計解憂

尋日嘅會面分線上同線下，近百人出席。謝偉銓提到無論搵到幾多地，冇人手係做唔到，而依家顧問公司欠缺人手逾兩成，加上本地高等院校相關學科嘅學額過少，亦都令到有意投身行業嘅人士大減。當然，問題唔止咁少，佢又提到現時有人手浪費情況，因為要處理過多行政工作同重複性嘅文件。

為咗快啲起屋畀市民住，佢喺會上有好多建議，包括引入公私營合作模式，令私人發展商同政府合作起資助性房屋，相信可令售價更加優惠。此外，喺行政工作上，佢建議引入更多科技解決。而近日惹起爭議嘅高爾夫球場去留問題，佢就指政府要吸取教訓，又關注並非單一事件，其他改劃地日後可能出現同樣情況，所以政府要盡快審視，部門之間亦要加強協調。